कृष्णभक्ति के छन्द (घनाक्षरी कवित्त) :: रविकान्त सनाढ्य, भीलवाड़ा, राजस्थान

आज तो परम लघु रूप धरि लीनो आप, 

पीछै तो अकास को अमित बिस्तार है ।

यहि एक अचरज अगुन पुकारै कोई, 

कोई बतरावै तुम्हैं गुन को अगार है ।

माया के निधान,लोक- लोकन विलास तेरो, 

जगत् के कण- कण तेरो ही प्रसार है।

कहै रविकंत, सार तू ही है अनादि ब्रह्म,

दुनी तो प्रपंचमय, परम असार है ।।

पीत-पट  वारै प्रभु, साँवरै तिहारी छवि, 

नित नयो रूप लेके मोहि अति भावै है ।

आपको  स्वरूप है अनूप औ हृदयग्राही, 

मन को अनंद मेरो बढ़ि- बढ़ि जावै है ।

पीरी- पीरी गोल पाग, मुगता की लड़ी संग,

खूब जँच रही,छटा और ही बनावै है ।

कहै रविकंत, बलिहारी तो पै जाऊँ स्याम,

धन्य- धन्य होवै जो भी प्यार तेरो पावै है ।।

पीरे -पीरे  दुपटे पै हरो वेस खूस सोहै , 

संयोजन गुलाबी-सफेद मन मोहै है ।

मोर पंख साँवरे को स्वर्णमय है बिसाल , 

मधुर बिलोकनि भी चित्त  को विमोहै है ।

मेरे नंदलाल तू अनंत सुषमा को धाम , 

आभ तेरी नई -नई नित ही नितोहै है ।

रूप की ही प्यास मुझे चाँद तू चकोर हूँ मैं , 

तृषा तीव्रतर मन चकित चितौहै है ।।