कृष्णभक्ति के छन्द (घनाक्षरी कवित्त) :: रविकान्त सनाढ्य, भीलवाड़ा, राजस्थान

 

आज तो परम लघु रूप धरि लीनो आप, 

पीछै तो अकास को अमित बिस्तार है ।

यहि एक अचरज अगुन पुकारै कोई, 

कोई बतरावै तुम्हैं गुन को अगार है ।

माया के निधान,लोक- लोकन विलास तेरो, 

जगत् के कण- कण तेरो ही प्रसार है।

कहै रविकंत, सार तू ही है अनादि ब्रह्म,

दुनी तो प्रपंचमय, परम असार है ।।

पीत-पट  वारै प्रभु, साँवरै तिहारी छवि, 

नित नयो रूप लेके मोहि अति भावै है ।

आपको  स्वरूप है अनूप औ हृदयग्राही, 

मन को अनंद मेरो बढ़ि- बढ़ि जावै है ।

पीरी- पीरी गोल पाग, मुगता की लड़ी संग,

खूब जँच रही,छटा और ही बनावै है ।

कहै रविकंत, बलिहारी तो पै जाऊँ स्याम,

धन्य- धन्य होवै जो भी प्यार तेरो पावै है ।।

इन्द्रधनुषी है छटा, मुतियन- माल अटा, 

आज का स्वरूप तो रुचिर मुग्धकारी है ।

गिरिवरधारी, मेरे मुरली- बजैया तुम, 

नील-घन- आभ तेरी श्याम सुखकारी है ।

विहँस के देखो नंदलाल कछू मेरी ओर 

बिरद तुम्हारो तो महान उपकारी है । 

सबद नहीं हैं पास, रूप क्या बयान करूँ,

छवि नित नई , रविक॔त बलिहारी है ।।