रजत- प्रधानता है बेस- आभरण माँही,
स्वर्ण भी दिपत रह्यो, कहनी क्या बात है ।
पुहुपों के भाग देखो, छनिक है जीवन पै,
प्रभु जी के तन पर खिले मुसकात है ।
अनुराग जीवन को एकमेव मूल तत्व,
पिछवाई यो संदेश कहि बतरात है ।
ऐसी ही विमोहक-सी चितवन नंदलाल,
डारते ही रहियो, अनंद सरसात है। ।
तन मेरो वृंदावन, मन निधिवन बन्यो ,
प्रेम के सघन कुँज आइकै खिलाइए,
हिरदै में बस रह्यो आपको युगल रूप ,
नित्य लीलालीन आप रास को रचाइए ।
प्रेम के पुनीत सर,करुना को जल बहा,
कालिन्दी-कदम्ब कूल प्रिय अन्हवाइए।
पीतपटधारी मेरी अरदास इती-सी है ,
रसना पै प्यारै नाम-रूप बस जाइए।।
लाल-लाल ललित-ललाम वेसधारी श्रीजी,
उर में बिसाल माल अतिअभिराम है ।
नीको है मुकुट लाल , नीलमों से जड़्यो हुओ,
मोरपखा वारो मेरो प्यारो घनश्याम है ।
हीरे की ठसक देखो, चाँदी की चमक खूब ,
गोप -गोपी सखा यह, सुषमा को धाम है ।
राजराज तीन लोक-लोकन को अधिपति,
सबको है सिरमौर याको बड़ो नाम है।।
 :: रविकान्त सनाढ्य, भीलवाड़ा, राजस्थान){kind=link}